Musiqi mağazası

Zəlimxan Yaqub

Nyu-York şəhərində bütün dünyada məşhur olan Brodyev adlı bir küçə var. Bu küçə gecələr başdan-başa işıq selinə, işıq axarına dönür. Baxanda elə bilirsən günəşin bir parçası qopub bu yerin üstünə düşüb. Bu küçədə dünyanın bütün xalqlarının musiqi xəzinəsini özündə əks etdirən çox böyük bir musiqi mağazası var. Qulaqcığı qulağına tax, hansı xalqın musiqisini istəyirsənsə, istədiyin qədər dinlə, sev, ləzzət al. İstədiyin musiqi valını ən qiymətli hədiyyə kimi götür, dünyanın harasına istəyirsən apar. Klassik və müasir musiqi nümunələrinə qulaq asdıqca adama elə gəlir ki, bu geniş salonda, mənəvi dəyərlər mərkəzində bütün dünya xalqlarının ürəyi döyünür, səsi eşidilir, ruhu çırpınır. Ancaq təəssüflər olsun ki, axtarsaq da, bu ruhlar, bu səslər dünyasında Azərbaycan musiqisindən bir dənə də olsun əsər-əlamət görmədik. 23 gün vətəndən ayrı düşən, uzaq Amerika qitəsində Azərbaycanın səsi, sözü, ruhu, müqəddəsliyi üçün darıxan bir ruh adamından ötrü bu yoxluğun nə dərəcədə ağır və nisgilli olduğunu həssas oxucu çox aydın başa düşər.

Bu səslər hamısı tanrı töhfəsi, Gur səslər içində bir səs gəzirdim. Qürbət soyuğunda üşüyən kəsi Ovudan, qızdıran nəfəs gəzirdim.

Bura ayrı yerdi, ayrı həyatdı, Hanı bu həyatın Azərbaycanı. Üzeyir ayrıca bir Kainatdı, Hanı Kainatın Azərbaycanı.

Qəlbin çırpıntısı, ruhun bəstəsi, Hanı “Kürd ovşarı”, hanı “Şur”, görən? Zirvələr fəth edən Xan şikəstəsi Niyə bu zirvəyə qovuşmur, görən? Hanı yurdumuzun səs şəlaləsi, Gələ, daşa burda, tökülə burda. Hanı saz harayı, kaman naləsi, Dağlar qaya-qaya sökülə burda.

“Segah” şirinliyi dönüb bal olsa, Həsrəti çiynimdən ata bilərdi. “Yanıq Kərəmi”dən bircə xal olsa, Sevincdən ürəyim yata bilərdi.

Batmış gəmi kimi cumdum dərinə, Ölürəm, ölənə bir həyat verin. Çörək əvəzinə, hava yerinə, Mənə bircə parça muğamat verin.

Yaman darıxmışam bu yad şəhərdə, Bir “Misri”, bir “Cəngi” dirildər məni. Axsa ürəyimə səs pərdə-pərdə, O səsin çələngi dirildər məni.

Qədir zənguləsi, Alim cəh-cəhi, Allah vergisidir, vergim bəs hanı? Yerin şadlığıdı, göyün fərəhi, Bu səs dünyasında sərgim bəs hanı?

Bu da Qarabağın taleyidimi, Min yerdən dolaşıb, düyünə düşə. Səsimiz çatmaya kar qulaqlara, Zamanın səsinə, küyünə düşə.

Duy, nədir qəlbimdə coşan nəğmələr, Tanı Amerika, haqqımı tanı! Allah ölkələrə salanda nəzər, Sazından, sözündən, muğamatından, Səsindən tanıyıb Azərbaycanı!

2001, iyun Nyu-York

Musiqi mağazası

Şərhlər

Şərh yaz

Digər şeirlər