Mərdimiz – dərdimiz

Qurd yedi, taladı bu ağacları, Nə qədər ağac var qurdun içində. Çaqqal var, tülkü var, it var, pişik var, Didir bir-birini yurdun içində. Kökünü qazıdı dərd adamların, Nə qədər adam var dərdin içində. Həyatdan küsən var, candan bezar var, Nə qədər ağrı var, dərd var, azar var, Kimsəsiz ölü var, qərib məzar var. Mərdin sinəsini açın, göstərin, Nə varsa, aydınca görəcəksiniz, Nə varsa, yer salıb mərdin içində!