Mənliksiz yaşamaq bir mənlik deyil

Sevgidən alışmaq peşəmdir mənim, Nifrətdən danışmaq, o, – mənlik deyil. Çiçəyi açılmaz, arısı gəlməz, Kimin ki ürəyi çəmənlik deyil.

Zaman çal eylədi qara saçımı, Tanrı bağışlasın, varsa, suçumu. Paxıllıq qurd kimi yesə içimi, Daha o, mənlikdi, düşmənlik deyil.

Dolu sünbülü var, yetkin dəni var, Həm nurlu sabahı, həm dünəni var. Əsl kişilərin böyük “mən”i var, Mənliksiz yaşamaq bir mənlik deyil.