İlhamın

O gələndə soruşmur, Varmı yazıb-pozanın. Gəlişində bahar var, Qənimidir xəzanın. Sinəsində tufanı Nəğməkarın, ozanın. Dəniz kimi qabarıb Coşması var ilhamın.

Şirin sözü dolanar Obaları, elləri. Ona nəğmə bəstələr Duyan qəlbin telləri. Dəyişdirər səmtini, Dilə tutar selləri, Bayatısı, laylası, Qoşması var ilhamın.

Ney yandırar, saz tutar, Kaman çalar, tar tutar. Əsirgəməz varını, Nə qüdrəti var, çalar. İnamı sal daşları, Sinəsindən parçalar. Ən vüqarlı dağları Aşması var ilhamın.