Haqqı axtar-axtara
Üz tutduq gələn sabaha, Haqqı axtara-axtara. Əl açdıq qadir Allaha, Haqqı axtara-axtara.
Dəmir əsalar əyildi, Dəmir çarıqlar yeyildi. Kimi döydü, kim döyüldü, Haqqı axtara-axtara.
Əzildik, quma çevrildik, Yumşaldıq, muma çevrildik, Əkildik, şuma çevrildik, Haqqı axtara-axtara.
Kimi oğru, kimi doğru, Daşıdıq dərd, çəkdik ağrı. Haqq deyənin yandı bağrı, Haqqı axtara-axtara.
Dəvələr itdi səhrada, Gəmilər batdı dəryada. Könüllər gəldi fəryada, Haqqı axtara-axtara.
Süzüldük eşqin camına, Yağ olduq yanan şamına. Döndük Allah adamına, Haqqı axtara-axtara.
Sel tökülür çaya doğru, Çay axır dəryaya doğru, Dəniz baxır Aya doğru, Haqqı axtara-axtara.
Zirvələr boylanır göyə, Bəlkə, haqqı gördüm deyə. Qamışlar da döndü neyə, Haqqı axtara-axtara.
Çox yolçular dizdən oldu, Dağdan oldu, düzdən oldu, Çox gözlülər gözdən oldu, Haqqı axtara-axtara.
Var olan yoxa çəkildi, Dağ uçdu, arxa çəkildi, İsa çarmıxa çəkildi, Haqqı axtara-axtara.
Nəfəs dərdik, cana gəldik, Dolduq, ətə-qana gəldik. İncilə, Qurana gəldik, Haqqı axtara-axtara.
Baxmadı xərcə-xəraca, Hac deyənlər getdi haca. Məhəmməd çıxdı meraca, Haqqı axtara-axtara.
Əqidə, məslək tacımız, “Ənəlhəq”dir əlacımız, Öldü Mənsur Həllacımız, Haqqı axtara-axtara.
Çox qayalar çapasıyıq, Çox qalalar yapasıyıq. Axır bir gün tapasıyıq, Haqqı axtara-axtara.
Çaldı zili, çaldı bəmi, İnsan oğlu çəkdi qəmi. Qocalırıq, Oruc əmi, Haqqı axtara-axtara.