Günəşə bax
Oğlum Şəhriyara və o yaşda olan bütün oğullarımıza
Dan sökülür, Günəş doğur, Günəşə bax, mənim balam! Varlığını nurdan yoğur, Günəşə bax, mənim balam!
Parlasın göylərin zəri, Süz doyunca üfüqləri, Yığ qəlbinə şəfəqləri, Günəşə bax, mənim balam!
İşığı bol olan ürək, Yurda oğul, elə dirək, Gözlərinə şəklini çək, Günəşə bax, mənim balam!
Süzüləndə göydən işıq, Dünya tapır bir yaraşıq. Yerə vurğun, göyə aşiq, Günəşə bax, mənim balam!
Günəş qədər istin olsun, Günəş olmaq qəsdin olsun. Günəş kimi dostun olsun, Günəşə bax, mənim balam!