Güc

Ən böyük düşməni də dost eləmək istəyirəm. Tanrım! Mənə barış gücü ver! Ən dəli küləklərlə, Ən dolu şimşəklərlə Yarışa çıxmaq istəyirəm, Mənə yarış gücü ver! Tanımaq istəyirəm Doğunu, batını, Öyrənmək istəyirəm Şairlərin gücünü, Fatehlərin həyatını Mənə axtarış gücü ver! Öz evimin qapısı kimi Açmaq istəyirəm fəsilləri Yandırmağa yay gücü ver, Dondurmağa qış gücü ver! Fikrim torpaq əkən kotan kimi parıldasın, Mənə kotan qüvvəti, mənə xış gücü ver! El atan daş uzaq gedər, Müqəddəs işlər görməyə Mənə elin dilindəki, Xalqın ürəyindəki alqış gücü ver!