Gözlərimi özün qapa

Dedim gəl bir seyrə çıxaq, – Yox, gələ bilmərəm, – dedi. Dedim nazı bir yana qoy, – Yox, gələ bilmərəm, – dedi.

– Qapım açıq, baxtım açıq, Sevmir mənim baxtım açıq, İşıq kimi baxtıma çıx. – Yox, gələ bilmərəm, – dedi.

– Dağları en, dərəyə gəl, Ovçun mənəm, bərəyə gəl, Yaşıl bir mənzərəyə gəl, – Yox, gələ bilmərəm, – dedi.

– Budaqlardan dərim gülü, Qədəminə sərim tülü, Gəl sevindir bu könülü. – Yox, gələ bilmərəm, – dedi.

– Əcəl yatmır ipə-sapa, Kim itirə, kimlər tapa, Gözlərimi özün qapa. – Yox, gələ bilmərəm, – dedi.

– Dözümüm, səbrim üstə gəl, Zəhmətim, cəbrim üstə gəl, Ölürəm, qəbrim üstə gəl. – Yox, gələ bilmərəm, – dedi.