Gətirrəm

Qəlbindən keçəni gizlətmə məndən, Nə desən, gözümün üstə, gətirrəm. Bir gülün eşqinə min gül bağlaram, Dərib çiçəkləri dəstə gətirrəm.

Axtarıb dayazı, gəzib dərini, Seçib gövhərini, tapıb zərini, Dünyanın ən gözəl nəğmələrini, Zildə haraylaram, pəsdə gətirrəm.

Haqqın peyğəmbəri dindən ötrüdü, Tanrının tarlası dəndən ötrüdü, Allah nə veribsə, səndən ötrüdü, Mən də öz sevgimi səsdə gətirrəm.

Gözüm nura baxar, könlüm işığa, Zəlimxan heyrandı bu yaraşığa. Çevrilləm ozana, dönnəm aşığa, Dünyaya təzə bir bəstə gətirrəm.