Gəlmişəm

Alıb çiyinlərimə ömür adlı bir yükü, Qışdan yaza çıxmışam, yazdan yaya gəlmişəm. Yağış kimi hopmuşam torpağın ciyərinə, Süzülüb çeşmələrə, axıb çaya gəlmişəm.

Şimşəklə, ildırımla döyüşüm, davam olub, Könlümdə tufanlarım, başımda havam olub. Qarlı zirvə, dağ döşü, mənim ilk yuvam olub, Gülləri-çiçəkləri saya-saya gəlmişəm.

Dən-dən olub, ələnib, ələyindən keçmişəm, Çərxində fırlanmışam, fələyindən keçmişəm. Beşiyindən çıxmışam, bələyindən keçmişəm, Haqqın mənə verdiyi haqqı-saya gəlmişəm.

Ağladım, gözlərimin yaşını sildi dünya, Qədir ağacı əkdim, qədrimi bildi dünya. Mən ki doğulmamışdım, mənim deyildi dünya, Dünya mənim olanda mən dünyaya gəlmişəm.