Gəlmisən

Qardaş, söylə görüm İranda nə var, Eşitdim o yerdən təzə gəlmisən. Sənə bu yaşında gözəllər baxıb, Bir qız baxışında gözə gəlmisən.

Gözəllər əlindən alıb tabını, Çəkiblər məclisdə haqq-hesabını. Geyinə bilməyib ayaqqabını, Dönüb ayaqyalın bizə gəlmisən.

Ağıllı tərpənib tədbir tökənlər, Yaxanı çırmayıb yaxa sökənlər, Üzünü görməyib şallaq çəkənlər, Mey içib, dilində məzə gəlmisən.

Arifə qurbandı şairin canı, Gəl dostu-düşməni yaxından tanı. Dostumuz Nurəddin verib fitvanı, Zəlimxan dilində sözə gəlmisən.