Gələr

Sənin gəlişinlə gülər taleyim, Öz hökmüm, öz vaxtım, öz anım gələr. Uzanar məclisim səhərə qədər, Söhbətə Qorqudum, ozanım gələr.

Heyranam vurduğu hər incə xala, Mümkünmü qəlbimdə bir nisgil qala. Sevincim sel olar, inamım qala, Dərdin pərənini pozanım gələr.

Hələ gözümdədi neçə arzu-kam, Sənin eşqinədir yandırdığım şam, Səninlə hər zaman baharam, yazam, Döndərsəm üzümü, xəzanım gələr.