Gedəndə

Qəlbi gizli-gizli yandırar-yaxar, Cavanlıq yan düşüb əldən gedəndə. Güldə güllük qalmaz, düzdə gözəllik, Baharın qoxusu güldən gedəndə.

Ha çalış, geriyə fırlanmaz təkər, Ömrə payız gəldi, qaranlıq çökər. Təbiət ağlayıb göz yaşı tökər, Yaşılbaş sonası göldən gedəndə.

Zəlimxan, itirmə vaxtı, vədəni, Anla ağsaqqalı, tanı gədəni. El yadda saxlamaz evdən gedəni, İnsan əzizlənər eldən gedəndə.