Ən böyük yalan

Kül kimi sovurduq vaxtı göylərə, Ayların, illərin talanı buymuş. Allahdan bir uzun ömür istədik, Baxanda gördük ki, olanı buymuş.

Qəm adlı uçurum var, dərd adlı dərə, Bir xilas yolunu axtarır hərə. Kəsdi qarşımızı, kəsdi bənd-bərə, Zamanın döngəsi, dalanı buymuş.

Bir əsri çatdırmır əvvəldən sona, Ömür qurban gedir şaxtaya, dona. Kim ölməz söylədi insan oğluna, Dünyanın ən böyük yalanı buymuş.