Elə bil gün düşüb qarın üstünə

Damla yarpaqlarda əriyən kimi, Əritdin ömrümü, əritdin, gözəl. Gülüş dodaqlarda əriyən kimi, Əritdin ömrümü, əritdin, gözəl.

Dən saçın ağında əriyən kimi, Şamama tağında əriyən kimi, Piltə öz yağında əriyən kimi, Əritdin ömrümü, əritdin, gözəl.

Bağban baş endirər barın üstünə, Sürtər yanağını narın üstünə. Elə bil gün düşüb qarın üstünə, Əritdin ömrümü, əritdin, gözəl.

Fürsət nə amana, nə aha qalsın, Bahalı sevgimiz qoy baha qalsın. Ömrümüz bir az da sabaha qalsın, Çürütmə ömrümü, çürütmə, gözəl. Vallah, bu atəşdə kül olmaq olar, Əritdin ömrümü, əritdin, gözəl.