Dönə-dönə

Gəldim hüzuruna, ay çiçəkli dağ, Dolandım qoynunda mən dönə-dönə. Gəzdi saçlarımda səhərin mehi, Hərləndi başıma çən, dönə-dönə.

Sənə vurğun olmaq adətdi məndə, Gərək sevgisinə qul ola bəndə. Hər bulaq başında, hər göy çəməndə, Qurdun məclisimi sən dönə-dönə.

Zəlimxan istər ki, xəyala varsın, Fikrinin gücüylə dağları yarsın. Sənin qarın kimi, birdən ağarsın, Düşməsin saçıma dən, dönə-dönə.