Dolu getdim, dolu gəldim

Səfər etdim söz dalınca, Dolu getdim, dolu gəldim. Bu dünyanın o başından, Mənə çatan yolu gəldim.

Hər sözümü tutdum zərə, Öz payını aldı hərə, Axdım yanan könüllərə, Çeşmə kimi sulu gəldim.

Nəfəsimdən nur yağası, Canım şeirin sadağası, Oldum sözümün ağası, Oldum haqqın qulu, gəldim.

Döndüm saza, döndüm neyə, Kəmənd atdım yerə-göyə, Ululardan deyə-deyə, Ululaşdım, ulu gəldim.