Dəyişməz

Hər zaman çalsa da öz havasını, Heç vaxt sənətkara rəğbət dəyişməz. Dünya dəyişər də, dəyişilər də, Əqidə dəyişməz, sifət dəyişməz.

Kim südü çürüksə, o saxta çıxar, Kim şah olacaqsa, o taxta çıxar. Alına nə yazılıb, o baxta çıxar, Allahın verdiyi qismət dəyişməz.

Yazdığın yazıdan, əsərdən yapış, Sözün gücündəki kəsərdən yapış. Zəlimxan, qələmdən, dəftərdən yapış, Siyasət dəyişər, sənət dəyişməz.