Dərdi dağılmasa, dağılar ürək

Dərdi dağılmasa, dağılar ürək, Bilirəm dərd əhli niyə danışır. Biri qismətini yerdə axtarır, Biri arzusunu göyə danışır.

Daşıyır ağrını, çəkir acını, Bir sözdə axtarır son əlacını. Kimi saz eyləyir tut ağacını, Kimi qamış tapır, neyə danışır.

Çəkmişəm dağların daşı çəkəni, Dağ çəkməz gözümün yaşı çəkəni. Bədbəxt o kəsdir ki, başı çəkəni Qanana danışmır, keyə danışır.