De, gəlsin

Könül, sağlam toxum kimi, Səp dağa, düzə şeirini. Yaralara məlhəm eylə, İşıq bil gözə şeirini.

İnci gəzə, ləl axtara, Axtaran gözəl axtara. İgidlər əl-əl axtara, Gözəllər gəzə şeirini.

Ax çayın ahəngi ilə, Çax şimşəyin zəngi ilə. Çiçəklərin rəngi ilə, Naxışla, bəzə şeirini.

Dolu ürək, isti başnan, Gözləri yandıran yaşnan, Könüldəki od-ataşnan De, gəlsin, təzə şeirini.