Çəkməsin

Başım nələr çəkdi qoca dünyada, Mən çəkən dərdləri yağı çəkməsin. Fələk hər ömürdən nişanə qoysun, Kökündən çıxarıb tağı çəkməsin.

Zülmət gözlərimə endi çən kimi, Dərdim saçlarıma yağdı dən kimi. Heç kəsin anası mən çəkən kimi, Bayatı çağırıb, ağı çəkməsin.

Dağıtsın dən kimi, quş dara çəksin, Dərdi dağ itirsin, daş dara çəksin. Zəlimxan, dağlara, daşlara çəksin, Fələk sinəmizə dağı çəkməsin.