Bu dağların

Buz bulaqlar aynasıdı, Şüşəsidir bu dağların. Könülaçan göy çəməni, Meşəsidir bu dağların.

Hər yana açılar qolu, Gen sinəsi sözlə dolu. Çaxan şimşək, yağan dolu Nəşəsidir bu dağların.

Hey baxar yollara doğru, Yaman şeydi həsrət, ağrı. El gəlməsə, qara bağrı Bişəsidir bu dağların.

Asan deyil yaşa dolmaq, Min illəri yola salmaq. Qocalsa da, cavan qalmaq Peşəsidir bu dağların.