Bizdən salam olsun arif olana

Bizdən salam olsun arif olana, Haqq nə gündə xəlq eylədi dünyanı? Yer ilə göy nə saatda bəhs etdi? Yer nə üstə bəndə saldı asmanı?

Asman nə istədi bari-xudadan? Xuda nə əmr etdi ərşi-əladan? Kim idi gəldi, kimi apardı haradan? Nə surətdə gördü Məscid-Əqsanı?

Nə ab ilə orda aldı dəstəmaz? Neçə rükət əda eylədi namaz? Neçə kimsənəyə oldu pişnamaz? Onlar baqidimi, olubmu fanı?

Tez verəsən bu sözlərin isbatın; Nədəndi binası Abi-Həyatın? Hardadı məqamı Mələk əl-movtun? Nə tövr ilə alır insandan canı?

Bu təzə kəlamdı, olsun yəqini, Kəbə - qibləm, dinim - Məhəmməd dini, Atam Alməmməddi, Göyçə sakini, Adım Ələsgərdi, yaxşı bir, tanı!