Bir az da bizə söylə

Dağların şair oğlu, çəkil dağlar qoynuna, Şeiri bu məğrur dağa, bu geniş düzə söylə. Sevgini çiçəklərin qulağına pıçılda, Yanğını, alovunu ocağa, közə söylə. Dünya bir isti təndir – kim yoğura, kim yapa, Təbiət bir axtarış – kim itirə, kim tapa. Olmuşlar, olacaqlar bir-bir düzülər sapa, Köhnədə təzəni gör, təzədən təzə söylə. Dərdini, sevincini çox adama söylədin, Hərdən yanan çırağa, hərdən şama söylədin, Dodağından incilər dama-dama söylədin, Aç sinə dəftərini bir az da bizə söylə. Meydandan qaçan kişi igid deyil, ər deyil, Yollar kələkötürdü, ipək deyil, zər deyil, Əlli yaşın şeirini yazmaq bir hünər deyil, Yüz gəlsin, hünərin var, sözünü yüzə söylə.