Azaflı Mikayılla
Zəlimxan Yaqub
Ay bulaq başına tələsən gözəl, Könlümü əlimdən al, yavaş yeri. Tərpənər yerindən dağların mehi, Sürüşər başından şal, yavaş yeri.
Mikayıl Azaflı
Gözəllər eşqiylə çağlayan şair, Qocanı da yada sal, yavaş yeri. Qəlbini qəlbimə bağlayan şair, Ay qarasaç, qaldı çal, yavaş yeri.
Zəlimxan Yaqub
Ötməsin, aylara, illərə yalvar, Gəzməyə nə qədər çiçəkli yal var. Laləyə bənzəmə, bağrında xal var, Düşməsin qəlbinə xal, yavaş yeri.
Mikayıl Azaflı
Hər uca dağlardan səfa gözləmə, Hər həkim əlindən şəfa gözləmə. Hər keçən gözəldən vəfa gözləmə, Sayma hər şirini bal, yavaş yeri.
Zəlimxan Yaqub
Üstümə od tökər, yel əsdirərsən, Bağrımın başında tel əsdirərsən. Dəyməmiş meyvəmi tələsdirərsən, Düşər budağından kal, yavaş yeri.
Mikayıl Azaflı
Aşıq var ki, bülbül, gül aşiqidir, Aşıq var ki, sərvət, pul aşiqidir. Azaflı Mikayıl el aşiqidir, Gəl onun həmdəmi ol, yavaş yeri.
Zəlimxan Yaqub
Sənin şöhrətini aləmə yayır, Zəlimxan özünü bəxtəvər sayır. Qara saçlarından üçcə tel ayır, Sevdiyim havanı çal, yavaş yeri.